sábado, 15 de fevereiro de 2014

Retallos daquela infancia

Marta Dacosta, Bautista Álvarez e Manuel Bragado

Desde o público

Marta Dacosta e Bautista Álvarez

Bautista Álvarez e Manuel Bragado




Vídeo-resumos do acto de presentación.

terça-feira, 11 de fevereiro de 2014

Presentación de Retallos daquela infancia


Presenta
Marta Dacosta
Escritora e directiva da AC O Castro

Manuel Bragado
Director de Edicións Xerais
Bautista Álvarez
Autor

Venres 14 de febreiro
20.30 horas
Café De Catro a Catro
r/ Girona n.º 3 - As Travesas
VIGO


Bautista Álvarez, membro da xeración Brais Pinto e veterano político nacionalista, recolle neste seu primeiro libro de narrativa, que confesa “anda cerca das memorias”, un monllo de relatos ambientados nos anos da súa infancia nas terras natais de Las, Eiras e Loucía, no concello ourensán de San Amaro. Acontecementos relevantes daquela comunidade aldeá dos anos trinta e corenta recuperados do esquecemento con memoria fotográfica e relatados con pulsión inequivocamente literaria, non exenta de retranca, intriga e doses de tenrura. O cadáver dun mozo acoitelado, atopado na Telleira, xusto no lindeiro que separa a parroquia de Eiras da de Las, do que nunca se soubo a súa identidade. A procesión do santo Antonio de Las que tras os primeiros foguetes rematou en delirio colectivo e con san Roque feito un espantallo. Os amores do cabalo Mourego e a mula do Hixinio, que chegaron a compartir a morte. As lembranzas da escola de Andrade, de mestres de Falange como don Gabino, na que a mellor disciplina era o recreo e na que todos os días antes de saír pola tarde os alumnos tiñan que cantar o Cara al sol e o Oriamendi. A historia de Severo, o frustrado estudante de medicina polo que degoiraban as mulleres. Ou aqueloutra tan noxenta de Gaudesio, o carniceiro de Figueroa, o vingador de roxos, responsable de tantas mortes e outras atrocidades… Escritos con vontade literaria, utilizando unha lingua de raíz popular, estes retratos e relatos populares de Bautista Álvarez emparentan con páxinas de Ánxel Fole, Castelao e outros autores da tradición do mellor relato galego do século XX (presentación editorial de Edicións Xerais).